Naistan

 

دراوسێكان

| ئه‌رشیڤ | ئێمه‌یل |

به‌خێر بێن ..... ئیحسان ناوێك ئه‌م بڵاگه‌ ده‌نووسێت..... ئێوه‌ش ده‌توانن كۆمێنت بنووسن.

2003/10/19

په‌ریله‌ی دراوسێم؛ سوپاس و پیرۆزیشه‌، ئاگام لێیه‌ خه‌ڵاتكراویت.
ڤه‌ژینی ئازیز؛ ناوه‌ڵڵا له‌بیرم نییه‌ به‌ پێخواسی چووبمه‌ باڵه‌ك، له‌وه‌ته‌ی هه‌م ئه‌گه‌ر كاڵه‌كیشم نه‌بووبن كه‌وشم هه‌بوون!
ئه‌مما با تۆزێكتان بۆ باسی ئه‌وێ و سه‌فه‌ره‌كه‌م یان باشتر بڵێم سه‌فه‌ره‌كه‌مان بكه‌م، چونكه‌ به‌یانی زمسته‌ری زستانه‌مان ده‌ستپێده‌كات و دیسان ده‌چمه‌وه‌ ناو دونیای خوێندن و باشتره‌ ئه‌مڕۆ واده‌كه‌م بێنمه‌دی.
شوكر ئێستا كۆنه‌هه‌وارم تۆزێك ئارامه‌ و زۆر له‌ساڵانی رابردوو باشتره‌. دیاره‌ سه‌دان ئه‌گه‌ر نه‌ڵێم هه‌زاران ساڵه‌ ئه‌و نیشتمانه‌ی ئێمه‌ ئارام ‌و ئه‌و خه‌ڵكه‌ی ئێمه‌ش ئاسووده‌ییان نه‌دیوه‌، ئێستاش هه‌روا به‌ئاسانس نایبینن، به‌ڵام ئاشكراشه‌ كه‌ ئه‌و به‌شه‌ی كوردستان (مه‌به‌ستم به‌شی عێراقه‌) له‌و سی ساڵه‌ی دواییدا ئه‌وه‌نده‌ی نه‌هامه‌تی به‌خۆوه‌ دیتوون، كه‌ ده‌كرێ ئه‌و هه‌لومه‌رجه‌ی ئێستا به‌ زۆر باش وه‌سفكه‌ین. ئێ خۆ له‌چاو به‌شه‌كانی دیكه‌ی عێراق، ئێسته‌ كوردستان شامی شه‌ریفه‌!
خه‌ڵكێكی زۆری شاره‌كان سه‌رگه‌رمی خۆدامه‌زراندن بوون و به‌ئاواتی ئه‌وه‌ی كه‌ ببنه‌ "مه‌عاشخۆر"، ئه‌وه‌ش زیاتر بۆ زیادبوونی مانگه‌نه‌كه‌یان ده‌گه‌ڕێته‌وه‌، كه‌ هێشتا زۆرزۆر له‌ژێره‌. خه‌ڵكی زۆرێك له‌ لادێكانیش سه‌رگه‌رمی فرۆشتن و ساغكردنه‌وه‌ی به‌روبوومی ئه‌مساڵیان بوون، كاتی وه‌شاندنی گوێز بوو، تێر گوێزی نوێم خواردن.
وه‌ك جاران خه‌ڵكی كه‌متر سه‌رگه‌رمی سیاسه‌ت و حیزبایه‌تین و زیاتر به‌ته‌نگ پاره‌په‌یداكردنه‌وه‌ن. دیناری نوێی عێراقیش بازاڕه‌كانی شێواندبوو، دیاره‌ ئێستا دابه‌شكراوه‌ و ده‌ڵێن چونكه‌ چاپه‌كه‌ی تۆزێك باشه‌، خه‌ڵكیش جۆره‌ متمانه‌یه‌كیان پێی هه‌یه‌. به‌ڵام ده‌زانن بۆ خه‌ڵكی به‌ساڵاچوو سه‌خته‌ له‌گه‌ڵ حیسابی ئه‌و پاره‌ نوێیه‌ رابێن. یه‌ك به‌ سه‌دو په‌نجا واته‌ به‌ملیۆنێربوونی خه‌ڵكێكی زۆر له‌ چه‌ند چركه‌یه‌كدا! ئه‌و كه‌سه‌ی ده‌ هه‌زار دیناری هه‌بووبێت ئێستا خاوه‌ن ملیۆن و نیوێكه‌!!
هه‌ر له‌وێبووم كه‌ ساڵی نوێی خوێندنیش ده‌ستیپێكرد. ئه‌وه‌ی نوێ بوو سه‌ختگیری له‌ وه‌رگرتنی قوتابی نوێدا بوو، ئه‌وه‌ی هه‌ر چه‌ند رۆژێكیشی بۆ شه‌ش ساڵی مابن، له‌ پۆلی یه‌ك وه‌رنه‌ده‌گیرا. باقی شته‌كان زۆربه‌یان وه‌ك خۆیان ماون، سیسته‌می خوێندن و فێركردن، ده‌زگا ئێداریه‌كانیان، میتۆده‌كانی ده‌رسگوتنه‌وه‌ و هه‌ڵبژاردنی خوێندن ئاڵوگۆڕێكی بنه‌ڕه‌تیان گه‌ره‌كه‌. ئه‌مه‌ش باسی كۆڕێكی بچكۆڵانه‌مان بوو له‌ كۆلێژی ئادابی زانكۆی سه‌لاحه‌دین. له‌وێ ئێسته‌یش هه‌ر تێڕوانیینه‌ كۆنه‌كان سه‌باره‌ت به‌ مامۆستا و رۆڵی ئه‌و باون، میتۆده‌كانی ده‌رسگوتنه‌وه‌ هه‌ر ئه‌وانه‌ی كۆنن و سه‌رچاوه‌ و كتێبگه‌لی نوێش هه‌ر ده‌گمه‌نن.
له‌ دانیشتنی موناقه‌شه‌ی نامه‌یه‌كی ماسته‌ری به‌شی كۆمه‌ڵناسی ئادابی زانكۆی ناوبراو ئاماده‌بووم، ئه‌وه‌ی باسیلێوه‌نه‌كرا، ناوه‌ڕۆكی نامه‌كه‌ و لایه‌نه‌ سۆسیۆلۆژیه‌كان بوون. باس هه‌ر باسی چۆنێتی دانانی كۆما و كه‌وانه‌ و نووسینی سه‌رچاوه‌كان بوو. پرۆفیسۆری یاریده‌ده‌ری سۆسیۆلۆگ تێبینیه‌كانی خۆی كردن به‌دوو به‌ش: رواڵه‌تی و ناوه‌ڕۆكیه‌كان، كه‌چی له‌ هه‌ردوو به‌شه‌كاندا هه‌ر جۆری یه‌كه‌میانی ده‌رخوادر داین. حه‌یفێ!
ئه‌وه‌ی خه‌فه‌تم بۆ خوارد، ئه‌و فیلمه‌ بێ هونه‌ر وبێ ناوه‌ڕۆكانه‌بوون، كه‌ له‌ رێی سی دیه‌وه‌ خۆیان به‌ زۆربه‌ی ماڵاندا ده‌كه‌ن.
شتێكی دیكه‌ش كه‌ ئازاری ده‌دام، مامه‌ڵه‌كردن بوو له‌گه‌ڵ كورده‌كانی ئه‌ودیو سنووری ده‌سكرد. له‌ قه‌ڵادزێوه‌ به‌ره‌و رانیه‌ ده‌هاتین و كابرای سه‌یته‌ره‌ به‌ هیچ قه‌ناعه‌تی نه‌ده‌هات كه‌ بابه‌ من "عێراقیم" و "ئێرانی" نیم. باشه‌ بۆ نابێ كاروباری سه‌فه‌ری ئه‌وان بو شاره‌كانی كوردستان تۆزێك ئاسان و رێكبكرێت، له‌ كاتێكدا كه‌ رۆژانی پێنج شه‌ممه‌و هه‌ینی رێگه‌ی هاوینه‌ هه‌واره‌كانمان له‌به‌ر خه‌ڵكی ناوه‌ڕاست و باشووری عێراق به‌رناكه‌ون!
گۆڕانێكی دیكه‌ش، كه‌ هه‌ر چه‌نده‌ جێگه‌ی سه‌رسوڕمان نییه‌ وه‌لێ جێگه‌ی سه‌رنجدانه‌، گۆڕانی سوڵكه‌ره‌كانی شاره بوو له‌ كورده‌وه‌ بۆ عه‌ره‌ب.
ئه‌مما باڵه‌كه‌كه‌ی تۆ كاك ڤه‌ژین، راستستده‌وێت له‌وه‌ته‌ی هه‌م ئه‌وێم ئاوا خۆش نه‌دیووه‌. له‌وه‌ته‌ی له‌بیرمه‌ ئه‌و ناوچه‌یه‌ هه‌ر خاپوورده‌كرێت، دێیه‌كان بۆمباران ده‌كرێن و ده‌سوتێنرێن و كانیاوه‌كان ده‌ته‌قێنرێنه‌وه‌. له‌وه‌نه‌ له‌و ساڵانه‌ی شه‌ڕی براكوژیش ئه‌و ناوچه‌یه‌ له‌ ناوچه‌ هه‌ره‌ زیاندیتوه‌كان بێت، ئاخر خۆت ده‌زانی زۆربه‌ی خه‌ڵكی ئه‌و ناوچه‌یه‌ لایه‌نگری حیزێكن و زۆربه‌ی ناوچه‌كه‌ش له‌لایه‌ن حیزبه‌كه‌ی دیكه‌وه‌ كۆنترۆڵكرابوو. شوكر ئێسته‌ تۆزێك ئاسووده‌یه‌ و خه‌ڵكی سه‌رگه‌رمی خۆشكردنی دێیه‌كانیانن. بۆ زێده‌كه‌ی تۆ خه‌ریكی خۆشكردنی جاده‌ و بۆ زێده‌كه‌ی منیش له‌ خه‌ریكی چه‌قاندنی دارته‌لی كاره‌با بوون.
له‌به‌رنامه‌مدابوو سه‌رێكی سه‌رده‌شت و ئه‌و خزمانه‌ی ئه‌وێم بده‌م، به‌داخه‌وه‌ بۆم نه‌لوا. ئه‌ویش كه‌سه‌رێكی دیكه‌ی سه‌فه‌ره‌كه‌م بوو.
به‌ هه‌رحاڵ، له‌چاو ماندووبوونی رێگا، سه‌فه‌ره‌كه‌مان تۆزێك كورت بوو، ئه‌گه‌رنا خۆش بوو. له‌ هه‌موویشی خۆشتر و له‌پێشتر، دیتنه‌وه‌ی دایكم بوو.
با باسی هێندێك له‌ گۆڕانكاریه‌ كۆمه‌ڵایه‌تیه‌كانی كۆمه‌ڵگه‌ی ئه‌وێ بۆ ده‌رفه‌تێكی دیكه‌ بێت.
ده‌ڵێن چی، سه‌فه‌ری داهاتوو پێكه‌وه‌ بكه‌ین، دڵنیام سه‌فه‌رێكی خۆش ده‌بێت؟

ئێوه‌ ده‌ڵێن چی؟