Naistan

 

دراوسێكان

| ئه‌رشیڤ | ئێمه‌یل |

به‌خێر بێن ..... ئیحسان ناوێك ئه‌م بڵاگه‌ ده‌نووسێت..... ئێوه‌ش ده‌توانن كۆمێنت بنووسن.

2003/02/22

حه‌زده‌كه‌م به‌هار بێت و له‌ ئاوه‌دانییه‌ك بم، فرۆكه‌ و شه‌مه‌نده‌فه‌ر كه‌ هیچ، هه‌تا جاده‌یشی بۆ نه‌چێت كه‌ ئۆتۆمۆبیلی بگاتێ. سه‌فه‌رێكی یه‌ك دانه‌ڕۆژیم بێته‌ پێش و به‌ پێ ملی رێ بگرم. له‌ نێوه‌ی رێگادا باران دایدات و ئاسمان به‌گوڕ بێته‌خوار، په‌ناگه‌یه‌ك نه‌بێ په‌نای بۆ به‌رم و بارانیش نه‌یكاته‌وه‌. تاكه‌ شتانێك كه‌ گوێ بیستیان بم، گرمه‌ی هه‌ور و ده‌نگی كه‌وتنی دڵۆپه‌بارانه‌كان بن و به‌س. كه‌ له‌ شۆێنی مه‌به‌ست نزیكبوومه‌وه‌، ئینجا بیكاته‌وه‌. بچمه‌ سه‌ر به‌ردێك و له‌به‌ر هه‌تاوی دوای بارانی به‌هاران ساتێك بۆی دانیشم. من سه‌رتاپا ته‌ڕ و زه‌وی سه‌رتاپا سه‌وز و ئاسمانیش سه‌رتاپا شین، كۆلكه‌ زێڕینه‌یه‌كیش جه‌مسه‌ره‌كانی خۆی به‌سه‌ر ئاواییه‌كانی ئه‌وناوچه‌یه‌دا شۆڕكاته‌وه‌.

ئێوه‌ ده‌ڵێن چی؟

2003/02/18

كاك ره‌زا (قه‌ندیل) سه‌لام؛
بڕوا بكه‌ یه‌كێك له‌ ئاواته‌ هه‌ره له‌ پێشه‌كانی‌ ‌ژیانم، دیتنی ده‌ورانی دوای سه‌دام حوسێنه.، هه‌ر له‌ منداڵیمه‌وه‌ ئاواتی ئه‌و ڕۆژه‌ ده‌خوازم كه‌ ئه‌و سته‌مكاره‌ قۆڵبه‌ستده‌كرێت و كاخه‌كانیشی ئه‌نفالده‌كرێن. خۆشترین ڕۆژی ژیانیشم، ئه‌و رۆژه‌بوو كه‌ خه‌ڵكی رژانه ‌سه‌ر شه‌قامه‌كانی شار و په‌یكه‌ره‌كانی ئه‌ویان تێكشاندن. دیمه‌نێكیش كه‌ تاماوم له‌ زه‌ینمدا ده‌مێنی، فیلمی ئه‌و سه‌ربازه‌ عێراقیه‌ بوو كه‌ به‌ تانكه‌كه‌ی، یه‌كه‌م گولله‌ی به‌ وێنه‌یه‌كی زه‌به‌لاحی سه‌دامه‌وه‌ نا. هه‌رگیزاو هه‌رگیزیش دووكه‌ڵی سووتانی ئه‌و دێیه‌مانم له‌به‌رچاوان ون نابێت، كه‌ وێنه‌كه‌ی له‌ خواره‌وه‌ هه‌یه،‌ له‌ ماوه‌ی كه‌متر له‌ دووساڵاندا دوو جاران به‌ده‌ستی له‌شكری به‌عس سوتێنرا، هه‌ر بستێكی ئه‌و دێیه‌م لا له‌ باڵه‌خانه‌ به‌ره‌حمه‌تچووه‌كانی نیۆیۆرك زۆر خۆشه‌ویستتره‌.
ئه‌گه‌ر هیچ مه‌یلێكیشم به‌لای شه‌ڕه‌وه‌ بێت و نیگه‌ران بم له‌ نه‌بوونی شه‌ڕ، هه‌ر له‌به‌ر ئه‌وه‌یه‌ كه‌ پڕ به‌دڵ حه‌زده‌كه‌م، خوێنمژێكی وه‌ك سه‌دامیش به‌ ئاكامی ره‌شی خۆی بگات. هه‌رچه‌نده‌ هه‌ر وه‌ك یه‌كێك له‌ هاو گوندیه‌كانیشم نووسیبووی، سه‌خته‌ له‌و جیهانه‌ی ئێمه‌دا به‌چه‌ك سیسته‌مێكی دیموكرات جێگه‌ی سیسته‌مێكی دیكتاتۆری بگرێته‌وه، به‌ڵام له‌ ناوچوونی سته‌مكارانیش له‌خودی خۆیدا شتێكی دڵخۆشكه‌ره‌، جا ئه‌گه‌ر ئه‌وانی دواتریش هه‌ر له‌و جنسه‌ی پێشینانیان بن.
به‌ڵام كه‌ به‌ سه‌ختیش ده‌توانم هیواخوازی شه‌ڕ بم، چه‌ندین هۆی جیاواز هه‌ن: پێش هه‌موو شتێك له‌ ده‌ستوه‌شاندنی سه‌دام ده‌ترسێم و به‌دووری نازانم به‌شی ئه‌وه‌نده‌ی پۆدر گلدابێته‌وه‌ بۆ نموونه‌ شارێكی وه‌ك هه‌ولێر، كه‌ هه‌ر سی چل كیلۆمه‌ترێك له‌شكره‌كه‌یه‌‌وه‌ دووره‌، تووشی كاره‌ساتكات. ئاخر ته‌واوی ناتۆ له‌م ڕۆژانه‌دا سه‌رقاڵی ده‌سته‌به‌ركردنی پاراستنی توركیان له‌ ده‌ستوه‌شاندنه‌وه‌كانی سه‌ددام. هه‌روه‌ك باسیده‌كه‌ن، خه‌ڵكی هه‌ولێر و سلێمانی و شاره‌كانی دیكه‌ی كوردستان، خه‌ریكی به‌ستنی ده‌رگا و په‌نجه‌ره‌كانیانن به‌ نایلۆن و په‌تووی ته‌ڕیان بۆ رۆژی ره‌ش ئاماده ‌ده‌كه‌ن، به‌ڵام ده‌بێ چه‌نده‌ دادیان بدات؟ له‌لایه‌كی دیكه‌شه‌وه‌ دڵم هیچ به‌ داگیركردنی عێراق له‌لایه‌ن ئه‌مه‌یكاوه‌ خۆش نییه‌ و به‌ڕای من له‌ داهاتوویه‌كی دووردا كاریگه‌ری سه‌لبی زۆری ده‌بێت. پێموانییه‌ ئه‌مه‌ریكا هێنده‌ له‌ خه‌می دیموكراتیزه‌كردنی وڵاتانی ناوچه‌كه‌دا بێت، وایشچاوه‌ڕوانده‌كرێت كه‌ له‌ داهاتوودا رژێمگه‌لێكی دیكتاتور و ملهوڕ زۆر باشتر خواسته‌كانی ئه‌مه‌ریكا بێننه‌دی له‌ ده‌سه‌ڵاتگه‌لێكی دیموكراتیك. له‌لایه‌كی دیكه‌شه‌وه‌ هێنه‌ له‌ لیقاته‌ت و توانای هه‌ردوو حوكومه‌ته‌ كوردیه‌كه‌ دڵنیانیم كه‌ بتوانن جڵه‌وی رووداوه‌كان بگرنه‌ده‌ست و به‌قازانج كوردان بیشكێننه‌وه‌. ده‌ترسێم دوای شه‌ڕ و لابردنی سه‌ددام، كێشه‌ی ئێمه‌ش بكرێته‌وه‌ به‌ كێشه‌یه‌كی ناوخۆی عێراق و جارێكی دیكه‌ش خواسته‌كانمان دیزه‌ به‌ده‌رخۆنه‌ بكرێن. ئاخر زۆرمان له‌و جۆره‌ هه‌ڵوێستانه‌ رووبه‌ڕووبوونه‌ته‌وه‌. ئه‌وكات چی؟
ته‌واوی ئه‌وانه‌ش نامهێننه‌ سه‌ر ئه‌و رایه‌ی كه‌ نه‌بوونی شه‌ڕم لا له‌ مانه‌وه‌ی سه‌ددام پێ باشتر بێت، به‌ڵام سه‌ره‌ڕای هه‌موو ئه‌وانه‌ش، ئاشتیم له‌شه‌ڕ خۆشتر ده‌وێ ...

ئێوه‌ ده‌ڵێن چی؟